اصعب لحظة بحياتي بالغربة و بعيدة عن اهلي ...مشاركتي بالمسابقة

كيف الحلوين

رح عرف عن حالي للي ما بيعرفني هون ملقبة بكيوتي يمكن اكتر عضوة بتحكي و معبية الشات جرايد بس ما مللكون بقصتي انا سبق و ذكرتها بس هلا رح احكي تفاصيل اكتر

انا سورية تزوجت بعمر العشرين و ما كان مخطط الي اتغرب مع اني من قبل ما اتزوج كنت اتمنى اتغرب مو من شي بس لبعد عن حكي العالم و التعليقات اللي شو ما عمل الواحد ما بيخلص منها

تقدملي زوجي و وافقت و الحمدلله كتير مبسوطة انا و ياه و بحس عقله و تفكيره متل عقلي يعني اكتر حدا بالدنية بيفهم عليي

انا اجمالا مدللة عند اهلي البنت الصغيرة و كل شي بدي ياه بيصير و مو بس ع مستوى امي و ابي و اخواتي لا ع مستوى العيلة ككل يعني مافي مشوار الا بياخدوني معهون بكوني خفيفة دم و بساير الكبير و الصغير

بقيت 3 سنين بدون حمل بسوريا بعدين قررنا انا و زوجي نسافر عالامارات و انا طبعا رحبت كتير بالفكرة

و جيت لهون و اتأقلمت مع الجو و حبيت البلاد بس طبعا تضل غصة بقلبي بعدي عن اهلي بس الله يخليلنا الانترنت قربت البعيد و صرت دائما ع تواصل باهلي صوت و صورة

بعد سنة قررنا انا و زوجي نعمل حقن مجهري و بديت فيه و بقيت خمس شهور بسوريا بعد ما ثبت حملي لانو ما بيصير سافر و بقيت انا عند اهلي و زوجي بالامارات لانه ما فيو يترك شغله

و طبعا امي ما تخليني اعمل اصغر شغلة بالبيت خوفا ما يسقط الجنين

و لما صرت بنص الشهر الرابع سمحلي الدكتور سافر و قلي انو ارجع بنص الشهر التامن حتى اولد عنده بما انه بيعرف حالتي من الاول

و جيت لهون و بقيت ع تواصل مع دكتوري روح هون كل شهر ع مراكز بس اعمل صورة ايكو اتطمن عالجنين

و حجزت لسوريا قبل بشهر و بكون باول شهري التامن

و صارت المشاكل بسوريا و صارت كل ما الها تزيد

و قبل ب اسبوع من نزلتي تفاقمت المشاكل و زوجي لغالي التكت و انا انهارت نفسيتي لانو كل شي تغير بمخططاتي و حتى ما عدت اعرف وين بدي اولد و كيف رح كون لحالي و الزيارات للسوريين كانت موقفة ما حدا كان جنبي الا الله و زوجي

ع قد ما عصبت و انقهرت اثر عالجنين و قلت المي عنده و انا صار معي سكر حمل

و بقيت محمية كل الشهر التامن

فرجت عليي و سمحوا بالزيارات و عملت زيارة لحماتي و كانت ولادتي مقررة بنص الشهر السابع و كانت هي بتوصل ب 7 الشهر يعني قبل اسبوع

و كانت الصدمة لما كنت رايحة بتالت يوم من الشهر السابع يعني مقطعة 3 ايام من شهري التاسع رايحة راجع دكتورتي اللي قررت اولد عندها لما صدمتني و قالتلي جاهزة اليوم بدي ولدك الجنين حياته بخطر المي تقريبا نشفت

حسيت الدنية وقفت فيني ما عاد افهم و لا اسمع جمدت بارضي ما مجهزة شي حتى تياب البيبي هدية من اهلي و رح يبعتوها مع حماتي يعني ولا شي عندي هاد الحكي كانت الساعة 2 الضهر

رجعت عالبيت و دموعي ع خدي و عملت متل ما قالتلي الدكتورة اكلت اول شي بعدين ما عدت اكل شي مشان البنج

و بلشت ما اعرف شو اعمل و كل الوقث عم ابكي و زوجي يهديني

وقتها حسيت بقيمة الواحد لما يكون بين اهله و اشتهيت امي تكون معي ما بدي حدا غيرها بس للاسف ما كانت معي و رحت عالمشفى بعد ما جهزت حالي عالسريع و اشتريت كم قطعة للبيبي و كنت لسا ما حاسة عالصواب و خاصة اني خويفة كتير كتير

تقررت ولادتي 100% و جهزوني لغرفة العمليات و انا كنت رح صفرن من فزعي

ولما بلشو يجروني لادخل حسيت حالي فايتة عالموت و تركني زوجي و بقيت لحالي و صرت ارجف بطريقة هستيرية كيف اللي بيرجف و جاييتو نوبة صرع و دموعي تنزل و ما اقدر هدي حالي و حس هي اخر الدنية و صيح بدي امي ما بنسى منظر الاضاءة فوق راسي بغرفة العمليات و الدكتورة بلشت تعقملي بطني و الملقط مسكته متل المقص و انا فكرتها بدها تبلش قبل ما اتخدر و صرت صيح عليها صارت تقلي هاد ملقط مو مقص يمكن كنت رح غيب عن الوعي من خوفي قبل ما يأثر فيني البنج

و نمت خخخخخخخخخخخخخخخخخخخخ

و قعدت عالوجع و صرت سب كل اللي حواللي و ما اعرف شو عم يوجعني ما عدت اعرف شو عم احكي منيح اللي كانو ما بيفهمو عربي خخخخخخخخخخ

و بعدها عطوني المسكن و هديت و جابولي ابني .............ابني اللي الي خمس سنين عم استنى شوفه و كل فترة حملي عم اتخيله ابني نور عيوني اللي ما بتسوى دنيتي شي بلاه و صرت ابكي لما شفته و ضميته و شميته نسيت وجعي نسيت الدنية نسيت كل شي لما شفته

تمنيت اهلي جنبي يفرحوا معي يوقفوا جنبي بهي اللحظة بس للاسف كان بس زوجي معي طبعا زوجي حبيبي و تاج راسي بس ما حسيت بقيمة اهلي الا بهالموقف

حتى حماتي ما كانت هون اجت بعد 3 ايام من ولادتي كان كل عذابي خالص و كنت عم اقدر قوم و امشي و زوجي الله يخليلي ياه وقف معي و ساعدني كتير

بس بالاخر الواحد ما بيسواا شي بلا اهله

ديروا بالكون ع اهاليكون و ما تزعلوهن و حسوا بقيمة انكون قريبين منهون لانها نعمة ما بتتعوض

و بس هي قصتي بالغربة يمكن اصعب شي مر عليي بحياتي اننشالله تكونوا حبيتوها

سلاااااام يا حلوين من كيوتي

حبيبتي كيوووووووووووووتي قصتك ابكتني كثيرا فعلا الغربه صعبه جدا لكن احيانا الظروف تحكمنا
لكن ربنا ما بينسانا
ربي بعتلك زوج حنون وكمان سهل امور ولادتك ومتل ما قلتلي صبر 5 سنين نسيتيه لما شفتي ابنك بين اديكي

ربي ما يحرم فرحة الامومه لحد

ربي يسعدك

مون تسلميلي ع مرورك الحلو نورت مشاركتي و اسفة اذا قصتي بكتك ما كان قصدي هيك و الله يطعمك الحمل عن قريب يارب لتحسي بلذة هاللحظة

بالفعل ابكتني قصتك يا كيوتي
بس ولا يهمك يا عسل ربنا عوضك بابن نساكي وجعك

مشاركة مؤثرة فعلا حبيبتي كيوتي والحمد لله الذي اتمم فرحتك بمولودك الجديد
احلى تقييم لاحلى مشاركة

هدى واحلام وردية مروركون فرحني بس مابدي تزعلوا و تبكوا من قصتي بدي الكل يفرحلي اني كنت قوية وتجاوزت هالمحنة

كلمات جميله
مشاركة مؤثرة فعلا حبيبتي كيوتتي
وأحساس مرهف ومحب وعاشق


انتظر جديدك الرائع


لك مني كل الــود

احلى تقييم

حبيبتي كيوتي قصتك في الغربة وما حصل معك يوم الولادة ذكرني بأختي الصغيرة أسماء المغتربة باسبانيا لما راحت للمستشفى من أجل ولادة ابنتها نهال وهي لوحدها ومعها الله وزوجها فقط ولكن الله أرسل لها طاقما طبيا رحيما جدا وطيبا أكثر من اللازم وكذلك رزقها رب العالمين الصبر وولدت ابنتها على خير ...حتى هي لم تصدق أنها كانت تلد وهي تضحك مع الطبيبات الاسبانيات حتى أنها كانت تتوجع بالاسباني هههههههههه.
فعلا حبيبتي الغربة صعبة جدا جدا و لا يحس بقيمة الوالدين الا المغترب والبعيد عن الأهل ...وفعلا كما قلت لازم نهتم بأهلنا أكثر وأكثر لأنه بدونهم لا نسوى شيئا.
حبيبتي كيوتي أنا أعرف قصتك بالكامل لأنني كنت معك لما كنا هنا ههههههههه...ولكن ربنا عوض صبرك بابنك الأمور علي ...يا رب يحميه لك من كل شر ويطول في عمره حتى يصير أشهر صحافي ويكتب أحلى جرائد لأنه أكيد سيدمن ذلك معك هنا هههههه...ويصيروا أولادنا من قراء ما يكتب ههههه.

لك مني أحلى تقييم على قصتك المؤثرة جدا وعلى مشاركتك في المسابقة.

حبيبتي كيوتي
قصتك مؤثرة جدا
انا كنت بعرفها قبل لأن مع بشبش عشتها معك والحمد لله عدّت عخير
وفعلا ما في اغلى من الأهل
واللي مريتي فيه كتير صعب
الله يخليلك ابنك وتشوفيه عريس ويرزقك اخوان واخوات له
ويخليلك زوجك كمان ويجمعك مع اهلك بخير وسلامة

خنقتني العبرة وانا اقرأ قصتك غاليتي كيوتي دموعي في عيني
خفت ابكي وزوجي بقربي ويقول لي مذا ابكاك فيمنعني من النت ههههههههههه اختك حساسة شوي

ما اصعب الغربة بدون اهل
الله يهونها عليكي غاليتي ويفك كرب اهل سوريا اجمع وينصرهم وترجع سوريا امنة مطمئنة

يقيم

يا الله ما اصعب الغربه
انا كنت اتمنى اني اتغرب بس
بعد ما قرات تجاربكم ومشاركاتكم ومعاناتكم مع الغربه
لم اعد ارغب بها
قصتك مءثره فعلا
الله يخليلك جوزك وابنك حبيبتي
وتعيشي حياه سعيده
مع اسرتك كلها
اكيد نصحيتك غاليه ما حدا بيعرف قيمه
اللي بايده الا بعد ما يفقدها
اسال الله ان يحفط ابائنا وامهاتنا

قصتك حلوة ممزوجة بالام الولادة يا غلا

و الله دمعت عيوني لما قرأت شفت ابني و شميته و ضميته لصدري

الله يخليلك ياه يا رب
و يكبر على الدين و طاعة الوالدين
ان شاء الله

و الله لا يحرم كل امرأة تتمنى ذلكـ


قصتك حلوة اعجبتني جدا
و استمتعت بقرائتها

الله يحميك و يحميلك عائلتك الصغيرة و الكبيرة ايضا


موفقة ان شاء الله بالمسابقة

مليكة بشبش مسلمة امغار هبوش روعة و دين الحياة نورتو موضوعي و ردودكون اثرت فيني

بشبش و رورو كنتو معي من اول لحظات حملي ما بنسى وقفتكون معي

مسلمة عطيتيني نصايح ما بنساها وقفتي معي كتير الله لا يحرمني منك

مليكة و امغار و هبوش و دين الحياة ما بدي حدا يزعل يا حلوين انشالله الله يعطيكون كل شي بتتمنوه متل ما حققلي امنيتي و شفت ابني بين ايدي

صارت مشاركتي احلى بردودكن

سلام يا حلوين

تسلميلي بيبيشا الحلوة نورت موضوعي

cutey كتب:

مليكة بشبش مسلمة امغار هبوش روعة و دين الحياة نورتو موضوعي و ردودكون اثرت فيني

بشبش و رورو كنتو معي من اول لحظات حملي ما بنسى وقفتكون معي

مسلمة عطيتيني نصايح ما بنساها وقفتي معي كتير الله لا يحرمني منك

مليكة و امغار و هبوش و دين الحياة ما بدي حدا يزعل يا حلوين انشالله الله يعطيكون كل شي بتتمنوه متل ما حققلي امنيتي و شفت ابني بين ايدي

صارت مشاركتي احلى بردودكن

سلام يا حلوين

نعم حبيبتي كيوتي كنت معك في مراحل حملك ...والآن عرفت بمعاناتك مع الغربة يوم الولادة ولكن ربنا لا ينسى عباده.
يا رب يهون عليك غربتك حبيبتي ويخلي لك زوجك وأبو اللول ونحن هنا كلنا اخوتك وان شاء الله سنظل معك للأبد ويا رب نجتمع في أعلى الجنان.

الله يعينك ويعينا على الغربة هاد نصيبنا في الحياة لازم نتحمل وربي يخليلنا اهالينا