مرحبا يا حلوين
جبتلكون اكلة جديدة رح اعطيكون طريقتي بس الصور مو صوري خخخخخخخخ المهم انشالله تعرفوا كيف تعملوها و هي كتيييييييييييير طيبة
اول شي بدنا باذنجان صغير
بنقشره مو كلو بنقيم القسم الاخضر اللي من فوق و بنقشر ع شكل اقلام خط اي و خط لا بدون ما وصل الخطوط مع بعض و بنلاقي انسب مسافة بين خطين زابطين و بنعمل شق واحد صغير بكل باذنجانة
و بنقليهون بزيت وافر حتى يغير لونهون بس بنشيلهون قبل الاستواء الكامل بشوي
خلصنا من الباذنجان بتنركه يصفى منيح و يبرد شوي و باثناء قليه عالنار فينا نجهز الحشوة
و اللي هي بصل ناعم و لحمة ناعمة نحمسهون عالنار مع اضافة شوية ملح و البهار اللي بتحبوه في ناس بيضيفو جوز او صنوبر هي حسب الرغبة
الحشوة صارت جاهزة و الباذنجان جاهز بنبلش نحشي الباذنجان بقلب الشق اللي عملناه و ننتبه ما نكتر حشوة حتى ما تشق الباذنجانة و اذا زاد حشوة معلش بنخليها لنزين فيها الوجه
هلأ بعد ما خلصنا حشي الباذنجان بنجيب طنجرة تيفال او مقلاة غميقة و حتى ما يكون الباذنجان قريب للنار بنقطع بندورة شروحة يعني دوائر و يمكن نحتاج 3 او 4 بندورة مو اكتر و بنصفها طبقة وحدة باسفل المقلاة و بنصف فوقها الباذنجان و بنرصهون جنب بعض حتى ما يسبحو هلأ قبل ما نحط فوقهون الصوص بنجيب غطا لطنجرة او وعاء او حتى فيكون صحن يتحمل حرارة تقلبوه ع قفاه المهم بتحطو الغطا فوق الباذنجان بس المهم يكون اصغر من فوهة المقلاة و الغرض منو تثبيت الباذنجان حتى ما يسبح بالصوص او تطلع الحشوة منو ....
بعد ما نثبت الباذنجان بنعمل صوص ماء و رب البندورة او معجون البندورة نفسه يعني و ندوبه بالماء مع شوية ملح و يعني مو لازم يكون سميك كتير و بنصب الصوص فوق الباذنجان و بنعمل كميته بحيث ينغمر كلو و بنحطه عالنار يغلي ع نار هادية مدة ربع ساعة
و بهالاثناء بنقطع خبز حسب الرغبة بس بنقسمه قسمين قسم بنقليه او بنحمره بالفرن و قسم بس بنقطعه و بنتركه ع حاله و بعد ما يصير جاهز بنخلطهون بوعاء التقديم و بنفردهم باسفل الصحن لازم يكون صحن التقديم غميق شوي
و بهالاثناء بيكون خلص الباذنجان بنطالعه شوي شوي و بنصفه فوق الخبز
و فينا نحط باقي شروحة البندورة بين الباذنجانات
باقي مرحلة اخيرة هو عمل صوص الفتة بندق فص توم واحد ناعم و بنضيف لبن زبادي و طحينة و ملح و بنخلطهون منيح و بنشنهون بمية البندورة اللي غلينا فيها الباذنجان .... بس المزيج لازم يكون سميك مو كتير مريق بعدها بنصبه فوق الباذنجان و الخبز ز لازم تقريبا ينغمرو و بنجيب باقي الحشوة اللي زادت و بنفردها عالوجه و بنقلي مكسرات عالوجه حسب الرغبة و صحتين و هنا انشالله يكون الشرح مفهوم
صحة و عوافي من كيوتي
انتظروا جديدي
sms
