طريقة عمل مقلوبة لحم الحاشي بالخضار بالصور

طريقة عمل مقلوبة لحم الحاشي بالخضار بالصور

مقلوبة لحم الحاشي بالخضار ... هذي (( ما تبي نشدة شيخ )) ما تنتفوت وإلى حصلت لكم حتى وأنتم مسوين رجيم فدقوا فيها ولا عليكم وما جاكم عندي .

المقادير /

( خضار مشكلة مغسولة جيداً ومقطعة على شكل شرائح أوقطع كبيرة : بصل - فلفل رومي - قرع أمريكي - بطاطس - كوسا - جزر - طماطم - باذنجان - زهرة ) , ( رز مغسول ومنقوع لمدة 10 دقايق ) ,( لحيمات حاشي مقطعة قطع متوسطة ويشترط في الحاشي أن يكون من الوكالة يعني ما هوب تقليد مثل أكثر الحشو اللي في الملاحم اللي ماليةٍ الرياض وما جاورها ويستحسن أن يكون مسحوب بأذينته وهو يرضع من أمه وعلى طول للقصاب .... خخخخخخ ) ,( زيت زيتون ) ,( كم قرين فلفل من الحار ويفضل الأحمر بعد - مكعبين ماجي - علبة معجون طماطم - بهارات - ملح - ليمون أسود - قرفة أو دارسين كما نسميها )

الطريقة :

نكشن البصل بزيت الزيتون ( ما عليش مستعجل ) وإلا ودي أسهب في الشرح والخطوات .... بس العوامة خربانة ..... والسعابيل لا يمكن التحكم بها ..... لذلك تحملوا الله لا يهينكم أي قصور في الشرح .

نحط عليه البسكوت !!!!! قصدي قطيعات اللحم (( آآآآآه والله ودك تاكلها وهي نية )) , وحرك يا محرك ......

بعدين الله يسلمكم نتأكد إن اللحيمات إنحمست وذابت مع البصل ثم نصب شوي موية حارة عليها ونغطي القدر ونتركه لمدة 4 دقايق على نار متوسطة ثم نشيل الغطاء ونحاول نكشط الرغوة اللي على الوجه وهي بقايا على اللحم والعظم ما تطلع بالغسل العادي يعني لازم ماء حار .... وين بنقلبها دعاية كلورس ..... ما علينا نرجع للموضوع.

نكب الله يسلمكم الطماطم على اللحيمات ونحركها نحركها نحركها نحركها لين تذوب مع المكونات

نحط البطاطس والجزر .... وحرك يا محرك ....

ثمٍ البهارات والليمون الأسود ومعجون الطماطم والدارسين وباقي المكونات .....

وبعدين نحرك بشويش ......

تراني قلت بشويش علشان ما تنمرس الخضار ..... لا تقولون ما علمتنا !!!!!

نحط القرع الأمريكي والفلفل الرومي والباذنجان ونضيف القليل من الماء المغلي عليها.

ونحرك برفق

وآخر شي نحط قطع الزهرة فوق الخظار بشويش مرة لأنها كنها بسوت تفتت بسرعة.

نخليها شوي ثم نكب عليها الرز بطريقة فنية وسريعة تضمن تغطية كل الخظار واللحم بالرز كاملاً ثم نضيف مقدار من الماء المغلي أقل من مستوى الرز بقليل ثملا ننسى الفلفل فوق ثم نغطيها ونقصر على الغاز آخر درجة ونتركها لمدة ساعة ونصف .... وترى إن جاء واحدٍ يبلغ شفه ويفتح الغطى ترى الطبخة بتخرب يعني لا تفتح إلا بعد ساعة ونصف.

واللي ما يشوف إنه بيضبط كبة الرز و( عملية التلييس ) يدور له بناي وإلا يناديني أنا ما عندي مانع أبد في المساعدة (( إيه هين )).

هذي عملية القلب ..... أجل ليش سموها مقلوبة ؟؟؟؟؟؟؟

الحكاكة ..... هذي عاد يبي لها موضوعٍ ثاني غير هذا ...

بسم الله الرحمن الرحيم .....

وعساه على قلوبكم بالعافية ......

وتقبلوا أعذب وأرق تحية

» الدجاج بالخضار بالصور
» عمل طريقة السوبيا بالصور
» طريقة عمل صدر دجاج محشو بالخضار .
» طريقة عمل مكرونة بالخضار المشكلة
» طريقة صينية الارز بالخضار واللحمه بالخطوات المصورة